蔘雞湯

呢排訪客多，出街食咗好多餐，我有好幾餐都同佢哋去食韓餐，一來我自己鍾意食，二來大蘋果嘅韓餐變化多，又正宗，成日食都唔厭。

呢日下晝食蔘雞湯，海鮮豆腐煲，牛仔骨，午餐份量細細份，我哋仲叫咗個綠豆葱餅。呢間餐廳冇一枱前菜供應，只有一壺好好味嘅泡菜，一碟青菜沙律，一碟生紅蘿白，長青椒同埋紹菜。長青椒就咁點辣醬食，脆卜卜，好新鮮，一啲都唔辣架。