一鹹一甜

老友一家由温哥華飛過嚟大蘋果，再租車去美加幾個城市參觀大學，老友大仔出年要入大學，趁放暑假就嚟東岸呢邊，又玩吓，又睇吓學校。

經過三個星期舟車勞頓，老友返番嚟大蘋果，我除咗同佢哋出去食，出去玩，呢日就叫佢哋嚟屋企食住家飯，三個禮拜都喺外面食，一定好掛住啲湯水嘞。

老友細仔得幾歲大，等我整個爛玻璃啫喱俾佢至得。我又整咗個三色蛋做冷盤，俾老友送酒。咦，乜呢兩盤嘢咁似樣，都係一粒粒切成一塊塊，一鹹一甜，各適其適。

另一個冷盤係凉伴茄子，而另一個甜品就係綠茶紅豆糯米滋。