碗公

今次旅行全部由姨甥女安排，我因為前一排較忙，連上網睇吓宜蘭係乜嘢地方都無時間，唸住多數係近郊地方。

我哋住和風温泉旅館，旅館對面就有稻田。中午去咗一間叫碗公嘅餐廳食飯，到咗餐廳，喺出面影吓相，旁邊有大池塘同埋鴨農場，心唸今餐梗係食農家菜嘞。

當佢哋推咗呢兩盆嘢出嚟時，個個都嘩嘩聲，食晏咋喎，無唸過食啲咁嘅嘢，之後就一浪接一浪，鮑魚湯好好味，個湯碗大到好似花盆咁，唔知係咪咁，所以店名叫碗公呢？條蒸魚係魚生架上面個半條魚嚟架，一半做咗魚生，食完魚生攞番嗰半條魚入去蒸。餐廳伙記話雞同埋魚都係佢哋自養架，好新鮮。

全間餐廳有八張大枱，每枱都有叫嗰盆大嘢。姨甥女話係佢台灣朋友介紹嘅，不過佢朋友都未食過架，因為訂位要兩三個月喎，我哋係閒日去，所以一個月前訂都訂到。