宜蘭

我哋屋企未試過咁多人一齊去旅行，所以當佢哋同我講話六月初幾家人去台灣玩時，我即刻安排假期，非常期待呢個旅程。

一早我哋浩浩蕩蕩去到機場，連埋BB一共十六人。我先來一客翠華早餐，飛機上再來一客早餐，呢次個飛機餐唔係幾好食，但都好過喺美國坐幾個鐘頭機要俾錢買啲唔好食嘅三文治。

到咗台北，有兩部小巴接我哋去宜蘭，大約一個鐘頭就到酒店，我哋放好行李就出發覓食喇，不過傾盆大雨，求其搵間餐廳食就算。好彩食完飯之後雨亦停咗，我哋就去咗湯圍溝温泉公園，學吓當地人摺起褲腳喺水池行公園，仲包咗個池俾魚仔咬腳，我哋十幾人都係第一次玩呢樣嘢，嘻嘻哈哈，只有歡樂聲。

俾魚仔咬完腳，我哋行去火車站，一路行見到想食嘅就食，三星葱喺當地名產，鍾意食葱嘅梗要食葱多餅，芭樂又係台灣必食，粉圓更加唔駛多講。

我哋坐火車去羅東，呢晚嘅晚餐係羅東掃街，又俾我見到多葱餅，愈多葱愈啱我。

今次嘅旅程全部由姨甥女同佢老公安排，通常呢啲嘢係我做嘅，今次我只負責食玩瞓，仲同咁多屋企人一齊玩，呢個係一個非常難忘嘅假期呀！