蘭桂坊優閒午餐

見到有網友介紹蘭桂坊Lily & Bloom嘅午市自助餐，呢日約咗個後生女去試吓先。沿住條斜路行上去，後生女話俾我聽佢哋而家嘅蒲點，我亦話俾佢聽以前Disco Disco嘅風光，人生匆匆過，希望佢愛惜青春。

呢個係輕食自助餐，好味凍蝦三文魚沙律我食咗兩碟，所以主菜嘅燒豬腩肉同埋炸雞只食咗些少，仲有即整嘅芝士通心粉，飲埋架啡，呢餐都係128蚊一位，質素唔錯，環境又好，我仲叫後生女第日帶媽咪嚟試吓。

返咗嚟，見網友又去嗰度食晏，話價錢已加到148蚊一位。一加就20蚊咁加，我都發覺呢幾年返香港去親美心或者翠華，啲價錢次次都唔一樣，真難爲各位香港人。