團購中伏

難得今次返香港有十日咁多，揾啲嘢玩吓至得。網上見到有一個整蛋糕班團購，喺我未走前有一堂美其名情人節黑朱古力蛋糕，姨甥女又肯陪我去，就報咗名。從未去過乜嘢學整嘢食嘅班，成日都係喺網上跟人整，有時成功，也有失敗，所以今次都滿心期待學吓嘢。

老遠跑到去觀塘，課室喺工廠大厦，我又嚟一番懷緬嘞，細個住喺呢區，暑假工就係喺呢啲工廠大厦番工，物換星移，估唔呢啲工廠大厦仲存在。

入到去，課室坐滿人，睇見檯上嘅工具已覺唔多妥，海綿蛋糕已經整好，放喺心型模裏面，我哋全晚只負責把糖同埋忌廉打發好，跟住加入佢哋煲熔咗嘅朱古力，倒入個模就完成，跟住佢話蛋糕要放入雪柜四十五分鐘雪硬，全部人可以自由活動。我同姨甥女去咗APM行吓街食吓嘢，返到課室蛋糕仲未得，佢哋話今晚蛋糕太多，所以要耐啲喎。

等到夜晚成十點幾，終於等到個蛋糕，我哋求求其其灑上朱古力粉，放三塊朱古力喺面就完成，趕住走喇，浪費一晚時間，真混吉。