寶貝仔放寒假一個月，同朋友去咗越南三個星期背包遊，又坐長途巴士，又坐火車同埋内陸機。我自已後生嗰陣未去過背包遊，但都好鼓勵後生仔出去見識吓。我雖然唔係直升機父母，但始終會擔心，好彩而家科技進步，佢一路都有同我聯絡，又俾啲相我睇，我不知幾羡慕。
星期二佢玩完背包遊返咗香港，唸住第二朝就坐飛機返嚟，陪吓我哋兩老幾日，下星期就返去開學。
臨去機場前，佢又發燒又屙又肚痛，梗係上唔到飛機喇！都唔知食錯乜嘢，又唔知係咪凍親，去咗睇醫生，話係腸胃炎，俾咗藥食。休息咗兩三日，無發燒又無屙，唸住今朝返嚟。點知半夜起身又再勁肚痛，我喺咁遠，除咗牽腸掛肚，乜都做唔到，養兒一百歲，長憂九十九呀！
半夜我家姐同佢去咗急症室，打咗針食咗藥，而家好好多，睇吓聽朝又走唔走得先。凡事都可以由好嗰邊唸，感恩佢喺香港至病，如果佢喺越南病，我都唔敢去唸咯。
係咪越南d o野食出問題呢?
ReplyDelete都唔知食錯乜，去咗三個禮拜都無事，返到香港夜晚至唔舒服。
Delete好在香港有親人照顧佢，如果唔係仲擔心! 對佢嚟講，呢個旅程就更深刻!
ReplyDelete咁橋，我in laws啱啱去越南玩完一星期返嚟!
佢喺急症室等咗四個鐘頭，連香急症室都見識埋。
Delete我都未去過越南呀，好想去食番碗牛肉河粉。
希望仔仔花啲好返哂啦。 咁佢仲有無時間開學前陪你哋？
ReplyDelete年輕人真勇， 孭住背囊周圍玩。
坐緊飛機返緊嚟喇，星期一要返學，得一日喺屋企咋。
Delete可能係食左野呀, 我曾經何時都背包旅行過架, 第一日孭到我想嘔, 哈哈
ReplyDelete都唔知食錯乜，不過香港呢排好多人病呀。
Delete乜原來你咁犀利去過背包旅行，我最叻就試過一個人參加旅行團去菲律賓咋。
好在喺香港同有親人咋，如果喺越南病真係煩好多。
ReplyDelete仔女無論幾大，喺病時都係非常令父母擔心嘅，真係同年齡無關。你仔仔返到美國未？希望行程一切順利佢亦已經康復。
今曰返咗嚟，無乜事喇，多謝問候。唸番轉頭真係有啲驚，如果佢喺越南肚屙幾日，我都唔知點算。
Delete我未試過一個人去旅行，又未試過背包遊，又未試過露營之類。hope your son get better soon.
ReplyDelete佢無肚痛喇，多謝問候。
Delete我而家最想大班朋友或屋企人一齊去旅行。
真係算好彩，香港起碼有人照顧。
ReplyDelete感恩啊！佢話搭車經過醫院好似監獄咁呀。
Delete仔仔現在點呀？感恩唔係在越南病
ReplyDelete而家無事喇，非常感恩。
DeleteBACKPACK越南，好呀，襯後生試多啲唔同既野.. 見識多啲！
ReplyDelete不過做父母的，永遠都會担心自己的子女！
佢仲話下次要歐洲背包遊呀。
Delete好彩而家科技進步，可以知道行踪，如果唔係仲担心多啲。
越南是好地方, 但可能衛生就差少少啦..!
ReplyDelete一時唔適應,會好快無事 !
好多人都話越南衛生唔掂，可能我哋城市人平時太乾浄，唔適應，佢病咗幾日都好番喇。
Delete