吃喝玩樂以外

本來我只管吃喝玩樂，工作的事不甚上心，但有時與朋友吃飯，他們都對我工作上遇到的事很有興趣，等我喺呢度又即管寫吓。

某一天，雷電交加，航班不斷延誤或取消。有一隊强國人三十多人，航班取消咗，雞同鴨講，我嘅同事就叫我去招呼佢哋，我唔多願都要去喇，不過我話定比我D同事聽，等陣見到我大大聲，又或者好惡咁，千祈唔好嚇親，因爲强國同胞係咁樣溝通嘅。

我話俾强國人聽，我哋要第二日至有航班俾佢哋坐，不過佢哋行程好趕，第二日就趕唔切喇，因爲佢哋第二日又要坐飛機去第二度，佢哋問我可唔可以調另一架飛機嚟接佢哋喎，雷電交加，如果可調另一架機嚟就唔駛取消你本來嗰班喇！

不過佢哋仲算客氣，仲美女前，美女後咁叫我(我是中年婦人啊)，我都盡咗力，做埋我工作範圍之外嘅嘢去幫佢哋，佢哋好似都好多謝我咁。好嘞，佢哋決定去第二個機場改搭另一班飛機，直接去本來佢哋第二日要飛嘅目的地。

咁樣呢佢哋要攞番之前托運咗嘅行李，機場當時亂過亂世人，我幾經辛苦至揾到人摷到D行李，不過就揾唔到其中五件。而佢哋又要趕去另一個機場，我都好明白D行李差幾件係好麻煩，呢個時候，有一個人就情緒失控喇，一手攞起我掛喺心口嘅証件，睇我乜嘢名，話要投訴我，我就話俾佢聽，你要投訴可以，但唔可以惦我，我即刻同你叫警察，佢D同胞就勸開佢，又同我道歉。唉，我預料嘅場面始終都係發生咗，我真係好怕D强國人一堆人嘈嘈閉架，今次夾我喺中間添，嬲爆:-(