飛機餐

年紀大，骨頭硬，要坐十幾個鐘頭飛機返香港都幾辛苦，好彩我搵到份工可以有免費機票，如果有空位，仲可以坐商務客位。我安慰自已，人工低唔緊要喇，我一家三口一年坐幾次商務客位來回香港，如果計呢筆錢在内，我好高人工嘞。

由紐約飛東京，今次我揀咗日本餐，味道還可以，相信唔可以同亞洲嘅航空公司比較嘞。中途仲有巴馬火腿芝士小食，早餐就腸仔奄列。我通常喺飛機上睇兩套戲，瞓幾個鐘，食足三餐，好快就到東京架喇。轉機去香港時又食多一餐，不過我到咗香港之後，無論係我哥或者姐夫接機，佢哋都會同我去買番碗牛雜河至車我返屋企架。

過年期間碰上日本大風雪，我唔想經東京返紐約，費事上唔到機就麻煩，就買咗張員工票坐港龍飛上海，喺上海再坐自已公司飛機直飛美國。坐港龍，梗係經濟倉喇，不過飛機餐就啱哂我，有燒賣，蘿蔔糕，珍珠雞，喺飛機有點心食，幾開心呀。