繼續大閘蟹

之前一晚玩得太開心，呢日一早起身去飲茶，去咗間叫龍鳳嘅餐廳，我哋坐喺出面，秋風輕吹，環境一流，但點心味道仍未及得香港。

下畫我哋去咗世博，睇吓清明上河圖，又坐咗地鐵，去外灘Hotel Indigo 飲杯嘢，睇吓夜景。

夜晚我哋又食大閘蟹，今次飯局係喺新天地一間西餐廳嘅角落，爲我哋下厨嘅係餐廳老板嘅家厨，所以我哋點咗啲好家常嘅小菜，唔好睇嗰碟黑麻麻以爲係乜嘢，好好食嘅葱油雞呢架，啲洋葱香到不得了，隻雞又滑到不得了。

我哋每人都要一公一乸嘅大閘蟹，食完一隻再蒸一隻，一邊飲住紹興酒，一邊懷緬以前青春歲月，傾極都傾唔完。